Patriots yatsinze REG mu mukino wa mbere wa kamarampaka

Patriots yatangiye neza imikino ya kamarampaka, itsinda REG BBC amanota 84-75 mu mukino wa mbere.

Iyi kipe, itozwa na Niyomugabo Sunny yatangiye neza umukino, aho yageze iyobora REG n'amanota 23 kuri 3.

Gusa REG yagerageje kuva inyuma ngo ikuremo ikinyuranyo, byumwihariko mu gace ka gatatu ariko Patriots ibabera ibamba.

Birangira Patriots yegukanye intsinzi n'ikinyuranyo cy'amanota icyenda.

Damaria Franklin wa Patriots ni we wayoboye mu gutsinda amanota menshi, aho yatsinze amanota 26, mu gihe Jeffery Stubbs yatsinze amanota 17.

Naho Garba Kennedy ayobora mu gusama imipira iva mu nkangara, aho yasamye 16.

Sangwe Armel ni we watsindiye REG amanota menshi (14), mu gihe Garmine Kande yatsinze 11.

Nubwo REG yagaragaje ubushake bwo kugaruka mu mukino, gutangira nabi byayibereye inzitizi ikomeye, bituma Patriots itangira neza uru rugamba rwo gutanguranwa intsinzi eshatu mu mikino itanu ya 1/2 cya kamarampaka muri shampiyona y'icyiciro cya mbere muri basketball mu Rwanda.