Amakipe atatu, Al Hilal Omdurman, Al-Ahly Wad Madani, na Al Merrikh, yo muri Sudani ari mu biganiro na FERWAFA ndetse na Rwanda Premier League kugira ngo akine muri shampiyona y'u Rwanda.

Ayo makipe yasabye gukina muri shampiyona y'u Rwanda kubera intambara imaze igihe muri Sudani, dore ko shampiyona y'iwabo imaze imyaka ibiri irenga idakinwa kubera ibibazo by'umutekano biri muri Sudani.

Ibyo binatuma amakipe ahagararira Sudani mu mikino nyafurika (CAF Champions League na CAF Confederation Cup) yakirira imikino yayo hanze.

Umuyobozi Nshingwabikorwa w'urwego rushinzwe shampiyona y'u Rwanda (Rwanda Premier League), Karangwa Jules, yahamirije B&B Kigali ko ayo makipe yo muri Sudani yasabye gukina muri shampiyona y'u Rwanda, gusa avuga ko hatarafatwa umwanzuro.

Karangwa yavuze ko hakiri kurebwa uburyo ayo makipe yaza guhatana muri shampiyona, kandi ntibiyikome mu nkokora dore ko igeze ku munsi wa kane.

Yagize ati "Yego yarasabye. Turacyanononsora ngo turebe icyashoboka na cyane cyane ko Shampiyona yamaze gutangira."

Ayo makipe naramuka yemerewe gukina muri shampiyona y'u Rwanda, ni ubwa mbere bizaba bibayeho mu mateka y'iyi shampiyona.