Cassa Mbungo André yagizwe umutoza mukuru w'ikipe y'igihugu y'u Rwanda y'umupira w'amaguru y'abagore.

Ni nyuma y'uko iyi kipe ihamagawe ku wa 29 Mutarama 2025 mu rwego rwo kwitegura imikino ibiri yo gushaka itike y’Igikombe cya Afurika cya 2026.

Cassa Mbungo azaba yungirijwe na Mukamusonera Theogine ndetse na Munyana Seraphine, ni mu gihe Safari Mustafa Jean Marie yagizwe umutoza w'abanyezamu, naho Yadufashije Jeanine agirwa umutoza ushinzwe kongerera imbaraga abakinnyi.

Ikipe y'igihugu y'u Rwanda y'abagore yatangiye imyitozo kuri uyu wa Mbere, tariki 10 Mutarama 2025, kuri Kigali Pele Stadium.

U Rwanda ruzacakirana na Misiri mu gushaka itike y’Igikombe cya Afurika cya 2026, aho umukino ubanza utegerejwe tariki 21 Gashyantare 2025 i Kigali, naho uwo kwishyura ukinwe tariki 25 Gashyantare 2025 i Ismailia muri Misiri.

Cassa Mbungo w'imyaka 57 ni umutoza ufite inararibonye byumwihariko mu mupira w'amaguru w'abagabo, dore ko yatoje amakipe yo mu cyiciro cya mbere atandukanye yo mu Rwanda arimo AS Kigali, Police, Kiyovu Sports, Gasogi United, Rayon Sports, na Sunrise.

Uyu mutoza, ukomoka mu Rwanda, kandi yanatoje amakipe yo hanze y'u Rwanda arimo AFC Leopards (Kenya), Bandari FC (Kenya), na Jamus (Sudani y'Epfo), ari na yo aherukamo.

Ni ubwa mbere Cassa Mbungo atoje ikipe y'igihugu y'abagore, gusa yatojeho iy'abagabo y'u Rwanda mu 2014, ubwo yagirwaga umutoza w'agateganyo w'Amavubi.

GjbLvkwWcAA9-Q5

Photo: Ikipe y'igihugu y'u Rwanda y'abagore yatangiye imyitozo kuri uyu wa Mbere.

CALL UP

Photo: Abakinnyi 28 b'ikipe y'igihugu y'u Rwanda y'abagore bahamagawe.

arton8431

Photo: Cassa Mbungo yari amaze hafi umwaka atoza Jamus FC yo muri shampiyona y'icyiciro cya mbere mu bagabo muri Sudani y'Epfo.