Lomami Marcel yagizwe umutoza mukuru wa Kiyovu Sports, asimbuye Bipfubusa Joslin uherutse gusezera ku mirimo ye nyuma y'ibibazo by'ingutu byugarije iyi kipe.

Lomami, wabaye umukinnyi ukomeye mu makipe nka Rayon Sports, yahawe amasezerano yo gutoza Kiyovu Sports kugeza umwaka w'imikino 2024-25 urangiye.

Azungirizwa na Bagumaho Hamiss.

Uyu mutoza w'imyaka 39 asinyiye iyi kipe, yo ku Mumena, nyuma y'iyegura rya Bipfubusa Joslin wahagaritse akazi mu mpera z'icyumweru gishize kubera kutihanganira ibibazo by'amikoro byugarije Kiyovu.

Bipfubusa ntiyanatoje umukino wa shampiyona Kiyovu yanganyijemo na Gorilla igitego 1-1 kuri iki Cyumweru, tariki 15 Ukuboza 2024.

Uyu mutoza, ukomoka mu Burundi, yabanje guhagarikwa imikino ine adatoza kubera umusaruro mubi w'ikipe mu mpera z'Ukwakira 2024, ndetse bivugwa ko Kiyovu Sports yagerageje kumwirukana ariko ikisubiraho kubera ko yasanze ishobora kugwa mu ihurizo ryo kumwishyura agera kuri miliyoni 25 Frw

Kuri ubu, Kiyovu Sports iri ku mwanya wa nyuma n'amanota umunani ku rutonde rwa shampiyona nyuma y'imikino 13, aho imaze gutsinda imikino ibiri gusa, inganya ibiri itsindwa icyenda. Ikaba ifite umwenda w'ibitego 17.

Lomami si mushya muri shampiyona y'icyiciro cya mbere mu Rwanda, dore ko yatoje amakipe arimo Rayon Sports, Gorilla, na Gasogi United.