Paris Saint-Germain (PSG) yasezereye Liverpool muri 1/8 cya UEFA Champions League, nyuma yo kuyitsinda penaliti 4-1 mu mukino wo kwishyura wabereye kuri Anfield mu ijoro ryo ku wa Kabiri, tariki 11 Werurwe 2025.

Ousmane Dembélé ni we wagaruye PSG mu mukino, nyuma y'igitego yatsinze ku munota wa 12.

Nyuma y'uko iminota 90 isanzwe y'umukino irangiye PSG ifite igitego 1-0, hongeweho iminota 30 kugira ngo amakipe yombi yisobanure kuko Liverpool na yo yari yatsinze igitego 1-0 mu mukino ubanza.

Iyo minota 30 y'inyongera (Extra time) nta gitego kibonetsemo, maze hitabazwa penaliti.

Abakinnyi bane ba PSG, barimo Vitinha, Gonçalo Ramos, Dembélé, na Désiré Doué, bateye penaliti baranazitsinda.

Mu gihe, Mohamed Salah ari we mukinnyi wenyine winjije penaliti ku ruhande rwa Liverpool, aho Darwin Núñez na Curtis Jones bazirase, bituma PSG ikomeza muri 1/4.

PSG izahura n'izava hagati ya Clube Brugge na Aston Villa, zirakina umukino wo kwishyura kuri uyu wa Gatatu, muri 1/4.

Andi makipe yakomeje muri 1/4 arimo Bayern Munich yatsinze Bayer Leverkusen igitego 2-0 mu mukino wo kwishyura wa 1/8, ikomeza ku giteranyo cy'ibitego 5-0.

Inter Milan na yo yakomeje muri 1/4 ku giteranyo cy'ibitego 4-1.

Ni mu gihe, Barcelona yatsinze Benfica igitego 3-1 mu mukino wo kwishyura wa 1/8, ikomeza muri 1/4 ku giteranyo cy'ibitego 4-1.