Rayon Sports yahagaritse umutoza mukuru wayo, Robertinho, "kubera impamvu z'uburwayi," nk'uko byatangajwe n'iyi kipe mu rukerera rw'uyu munsi.

Iyi kipe, yambara ubururu n'umweru, kandi yahagaritse umutoza w'abanyezamu, Mazimpaka Andre, kubera imyitwarire mibi.

Ibi bitangajwe nyuma y'umusaruro mubi Rayon Sports imaranye iminsi aho kuva igice cya kabiri cya shampiyona cyatangira, yatsinze imikino ibiri gusa mu umunani yakinnye, itsindwa umwe, mu gihe yanganyije itanu.

Rayon Sports kandi iheruka gutakaza umwanya wa mbere yari imazeho amezi agera kuri atanu, nyuma yo kunganya na Marines ibitego 2-2 tariki 5 Mata 2025.

Gusa biravugwa ko intandaro y'ihagarikwa ry'aba batoza bombi ari umusaruro mubi w'ikipe, ndetse n'ibyemezo bagiye bafata mu mikino ikipe iheruka gukina birimo gukinisha abakinnyi babujijwe gukinisha barimo umunyezamu Khadim Ndiaye.

Kuri Mazimpaka we, bimwe mu bindi byatumye ahagarikwa harimo amafaranga ashinjwa kunyereza yari yahawe n'umwe mu bafana bakomeye ba Rayon Sports ngo ayageze ku bakinnyi ariko ntayabahe.

Rwaka Claude, uherutse kugirwa umutoza wungirije, ni we wasigaranye ikipe by'agatenganyo.

Uyu mugabo, wahoze atoza Rayon Sports y'abagore, ni we uzanatoza umukino ubanza w'Igikombe cy'Amahoro Rayon Sports izahuramo na Mukura kuri uyu wa Kabiri, tariki 15 Mata 2025, kuri Sitade Huye.

Mukura ni yo kipe yonyine yabashije gutsinda Rayon Sports muri shampiyona y'uyu mwaka kugeza ubu, aho yayikuyeho amanota atandatu.

Robertinho yageze muri Rayon Sports muri Nyakanga 2024, ubwo yari agarutse muri iyi kipe yagiriyemo ibihe byiza hagati ya 2018 na 2019.

Mazimpaka na we yagizwe umutoza w'abanyezamu ba Rayon Sports, yakiniye nk'umunyezamu hagati ya 2018 na 2020, muri Nyakanga 2024.