Rayon Sports izahura na Singida Black Stars yo muri Tanzania mu ijonjora rya mbere rya CAF Confederation Cup, nk'uko byavuye muri tombola yabereye i Dar es Salaam muri Tanzania ku gicamunsi cyo kuri uyu wa Gatandatu, tariki 9 Kanama 2025.

Umukino ubanza uzabera mu Rwanda hagati ya tariki 19 na 21 Nzeri 2025, naho umukino wo kwishyura ubere muri Tanzania nyuma y'icyumweru kimwe.

Singida Black Stars, iherutse gutangaza Miguel Ángel Gamondi, ufite inararibonye muri ruhago nyafurika, nk'umutoza mukuru wayo, yasoreje ku mwanya wa kane muri shampiyona y'umwaka w'imikino 2024-25 muri Tanzania.

Ubwo Rayon Sports yaherukaga guhagararira u Rwanda mu mikino nyafurika mu 2023, yasezerewe na Al-Hilal yo muri Libya mu ijonjora rya kabiri rya Confederation Cup.

Iyi kipe, yambara ubururu n'umweru, iracyarwana no gusubiramo amateka yakoze mu mikino ya CAF Confederation Cup, ubwo yageraga muri 1/4, igasezererwa na Enyimba.

Izakomeza hagato ya Rayon Sports na Singida, izahura n'izava hagati ya Flambeau du Centre n'indi yo muri Libya mu ijonjora rya kabiri.

Amakipe atandatu yonyine niyo atazahera mu ijonjora rya mbere rya CAF Confederation Cup mu mwaka w'imikino 2025-26 kubera uko yitwaye muri iri rushanwa mu myaka yashize.

Ayo ni: Wydad AC (Morocco), USM Alger (Algeria), CR Belouizdad (Algeria), Zamalek SC (Misiri), Al Masry SC (Misiri), na Stellenbosch FC (Afurika y'Epfo).