Rayon Sports yanditse amateka mashya mu mupira w’amaguru w’u Rwanda, yegukana CECAFA Kagame Cup 2026, nyuma yo gutsinda Gor Mahia yo muri Kenya ibitego 2-1 mu mukino wa nyuma wabereye kuri Stade Amahoro i Kigali.

Ni igikombe cya kabiri Rayon Sports yegukanye mu mateka yayo muri iri rushanwa nyuma y’icyo yatwaye bwa mbere mu 1998, ubwo yatsindaga Mlandege ibitego 2-1 ku mukino wa nyuma.

Mu mukino wa nyuma, Rayon Sports na Gor Mahia zakinnye umukino urimo guhangana ku mpande zombi, aho iminota 90 yarangiye amakipe yombi anganya 1-1.

Junior Kameni ni we watsindiye Rayon Sports, mu gihe Shariff Sabuni Sirengo yatsindiye Gor Mahia.

Rayon Sports yakomeje gusatira no gushaka igitego cy’intsinzi, amaherezo ibona icyo gitego mu minota y’inyongera gitsinzwe na Muhoza Daniel.

Kwegukana igikombe byashimangiye urugendo rwiza bagize muri CECAFA Kagame Cup 2026.

Iyi kipe isoje irushanwa idatsinzwe, ndetse ikomeza kugira umusaruro mwiza kuva mu matsinda kugeza ku mukino wa nyuma.