Thomas Tuchel yagizwe umutoza mukuru w'ikipe y'igihugu y'umupira w'amaguru y'u Bwongereza 'Three Lions'.

Uyu mugabo w'imyaka 51, watoje amakipe nka Chelsea, Bayern Munich na PSG, yasinye amasezerano y'amezi 18.

Azungirizwa n'umwongereza Anthony Barry, aho aba bombi bazatangira akazi tariki 1 Mutarama 2025, ubwo urugendo rwo gushaka itike y'igikombe cy'isi cya 2026 ruzaba rugiye gutangira ku mugabane w'i Burayi.

Ishyirahamwe ry'umupira w'amaguru mu Bwongereza (FA) ryari rimaze igihe riri gushaka umusimbura wa Gareth Southgate, weguye muri Nyakanga 2024, biza kurangira ryumvikanye na Tuchel, washyize umukono ku masezerano tariki 8 Ukwakira 2024 gusa bitinda gutangazwa kubera ko ikipe y'igihugu yari ifite imikino ya Nations League.

Tuchel yatoje mu Bwongereza mu gihe kingana n'umwaka umwe n'amezi umunani ubwo yari ari kumwe na Chelsea hagati ya 2021 na 2022.

Muri icyo gihe, uyu mugabo ukomoka mu Budage yahesheje The Blues igikombe cya UEFA Champions League atsinze Manchester City igitego 1-0 mu 2021.

Gusa Tuchel ntiyagiriye ibihe byiza i Munich, dore ko Bayer Leverkusen yabatwaye igikombe cya shampiyona mu mwaka w'imikino ushize.