APR FC izacakirana na Aigles du Congo yo muri Repubulika Iharanira Demokarasi ya Congo mu ijonjora rya mbere rya CAF Champions League.

Ibi byavuye muri tombola, yabereye ku cyicaro cya CAF i Cairo, mu Misiri, kuri uyu wa Kane, itegura uko amakipe azahura kugeza irushanwa rigeze mu matsinda.

Imikino ibanza iteganyijwe gukinwa hagati ya tariki 4 na 6 Nzeri 2026, mu gihe iyo kwishyura izaba hagati ya tariki 11 na 13 Nzeri 2026.

Aigles du Congo ni imwe mu makipe ari kuzamuka neza muri shampiyona yo muri Congo, ndetse ishobora guha akazi gakomeye APR muri uru rugamba rwo gushaka itike y'icyiciro gikurikira.

Mu gihe APR yaramuka ikuyemo Aigles du Congo, yahita ihura n'izatsinda hagati ya AS Port yo muri Djibouti na Zamalek SC yo mu Misiri mu ijonjora rizakurikira.