Umukinnyi wa Real Madrid, Vinicius Jr, yegukanye igihembo cy'Umukinnyi Mwiza wa FIFA mu 2024 mu birori byabereye i Doha muri Qatar mu ijoro ryo kuri uyu wa Kabiri.

Vinicius w'imyaka 24 yegukanye iki gihembo afite amanota 48 ahigitse Rodri, ukinira Manchester City, wagize amanota 43 ndetse na Jude Bellingham, bakinna muri Real Madrid, wagize amajwi 37.

Mu mwaka w'imikino 2023-24, Vinicius yafashije Real Madrid kwegukana ibikombe bitatu birimo UEFA Champions League, aho yanatowe nk'umukinnyi mwiza w'umwaka muri iri rushanwa.

Uyu munya-Brazil kandi yatsinze ibitego 24 mu mikino 39 yakinnye muri uwo mwaka w'imikino.

Vinicius yabaye umunya-Brazil wa mbere wegukanye igihembo cy'umukinnyi mwiza ku isi wa FIFA kuva mu 2007 ubwo cyegukanwaga na Kaká.

Byari ku nshuro ya cyenda Ishyirahamwe ry'Umupira w'Amaguru ku Isi (FIFA) ritanze ibi bihembo kuva ubufatanye bwaryo na France Football mu gutanga ibihembo by'abitwaye neza mu mwaka w'imikino ku isi bwahagarara mu 2016.

Vinicius yegukanye iki gihembo nyuma yo guhigikwa na Rodri kuri Ballon d'Or ya 2024 yatanzwe mu Ukwakira.

Ku rundi ruhande, umutoza wa Real Madrid, Carlo Ancelotti, yegukanye igihembo cy'Umutoza Mwiza w'Umwaka.

Bimwe mu bihembo byatanzwe:

Umukinnyi Mwiza w'Umwaka mu Bagabo: Vinicius Junior

Umutoza Mwiza w'Umwaka mu Bagabo: Carlo Ancelotti

Umunyezamu Mwiza w'Umwaka mu Bagabo: Emiliano Martinez

Igitego Cyiza cy'Umwaka mu Bagabo: Alejandro Garnacho

Umukinnyi Mwiza w'Umwaka mu Bagore: Aitana Bonmati

Igitego Cyiza cy'Umwaka mu Bagore: Marta

Umutoza Mwiza w'Umwaka mu Bagore: Emma Hayes

Umunyezamu Mwiza w'Umwaka mu Bagore: Alyssa Naeher

Real Madrid at FIFA

Photo: Perezida wa Real Madrid, Florentino Pérez (uri hagati), yitabiriye ibirori byahembewemo Carlo Ancelotti na Vinicius Jr.

FIFA BEST TEAM

Photo: Ikipe y'abakinnyi 11 beza batoranyijwe na FIFA mu bihembo bya 2024.